El Tribunal Supremu suspende la oficialidá en Nava
El Tribunal Supremu anuló l'alcuerdu plenariu que s'algamara en xunetu del 2001 pola corporación municipal de Nava pol que s'aprobaba la oficialidá del asturianu. Gobernaben daquella los Asturianistes de Nava, encabezaos por Xulián Montes, y la declaración d'oficialidá foi aprobada colos votos asturianistes, l'abstención del PSOE (nun siendo un conceyal, que votó a favor) y el votu en contra del PP. Claudio Escobio recordó en declaraciones a prensa que'l fallu del Tribunal Supremu, que «ye firme y contra'l que yá nun caben más recursos», ratificó esti añu el determín que nel 2005 yá adoptara'l Tribunal Superior de Xusticia d'Asturies y contra'l que namás Andecha Astur presentó un recursu de casación énte'l Supremu. Les dos sentencies declararon nulu, «por nun ser conforme a derechu», l'alcuerdu plenariu adoptáu el 8 de xunu de 2001 nel que s'aprobaron les ordenances municipales sobre la oficialidá de la llingua. Foi la delegación del Gobiernu, que nel 2001 taba a cargu de la popular Mercedes Fernández, quien presentó un recursu contra esti alcuerdu plenariu.
Xulián Montes (ex alcalde de Nava) recuerda qu'aquella declaración d'oficialidá del asturianu en Nava, como la que s'aprobó n'otros conceyos, «yera la política de xestos del momentu, cola que se pretendía enveredar la oficialidá del asturianu dientro del Estatutu d'Autonomía. Sabíemos que la Delegada del Gobiernu, Mercedes Fernández, diba impugnar esta decisión del plenu de Nava, pero inda asina fixímoslo conscientemente: yera importante aquella política de xestos pa que se viera que la demanda social del asturianu trescendiera a les instituciones». Anque nun-y sorpriende la decisión del Tribunal Supremu, a Xulián Montes esta situación déxa-y un taste amargu: «Nestes tamos cola llingua asturiana, como hai trenta años. Nun veo movimientu. Dalgunos partíos tán como la Parrala, nin a favor nin en contra, y otros totalmente en contra». Alvierte, amás, que con estes decisiones «vese que dalquién ta mui interesáu n'arroxar el fueu de la discordia. Yo creo que tán confundíos y que toos nos teníemos que manifestar en contra d'estes coses. Una cosa tengo clara: nesto de la oficialidá, un conceyu va detrás d'otru», argumenta.
José Manuel Pérez Fernández, profesor de Derechu Alministrativu de la Universidá d'Uviéu y miembru de la Fundación Caveda y Nava, tampoco nun se sorpriende pol determín del Tribunal Supremu «que vien a da-y la razón al Trubunal Superior de Xusticia d'Asturies». Según el xurista «ye un simple problema competencial. El Tribunal Supremu diz que los conceyos nun tienen competencies pa declarar la llingua asturiana oficial y énte esto, efectivamente, poco hai que dicir». Poco, asegura, pero sí dalgo: «Podía discutise la decisión. Ente otres coses podía argumentase que l'Estatutu vixente fai una reconocencia oficial de la llingua asturiana y qu'esiste una Llei d'Usu y Promoción de la Llingua Asturiana, polo que la declaración d'oficialidá de Nava y a la d'otros conceyos se circunscribiría a estos márxenes».
Otra manera, Pablo Fernández, responsable d'organización del Bloque por Asturies, decátase de que'l «marcu idóneu» pa llograr la oficialidá de la llingua asturiana «ye l'Estatutu y que'l Bloque por Asturies trabaya dende esa perspectiva». Según el políticu nacionalista, «de lo que se trata agora ye de xuntar toles sensibilidaes en favor de la oficialidá y planteales a la hora de la reforma estatutaria, que se va producir na prósima lexislatura con una nueva correlación de fuercies parlamentaries». Más allá de too esto, Fernández diz nun «creer na politización de la xusticia nin na xudicialización de la política, polo que nun-y parez de recibu una sentencia que pon en cuestión la decisión d'un plenu, la másima representación d'un conceyu». Considera, otramanera, «qu'esti determín vien a enguedeyar más el problema» y que «van mui confundíos los que quieren engafentar una cuestión que nun ye otro qu'una lícita aspiración democrática».
José Suárez Arias-Cachero, edil popular nel Conceyu d'Uviéu, quier manifestar énte too'l so respetu poles decisiones xudiciales. Una y bones dicho esto, esclaria: «Esti determín del Tribunal Supremu vien a rescamplar les graves deficiencies del marcu legal de la llingua asturiana, un marcu insuficiente. Ye obvio qu'un Conceyu nun ye'l llugar pa regular l'usu oficial de la llingua asturiana, eso tien que facelo l'Estatutu; pero esti determín rescampla namás una cosa: la insuficiencia del actual Estatutu».
Quien nun se sorpriende n'absoluto ye Xuan Xosé Sánchez Vicente, presidente del PAS, pa quien esti determín del Tribunal Supremu «yera absolutamente previble». Sánchez Vicente remembra «que yá lu manifestara nel so día, pa escándalu de les fuerces autollamaes progresistes, qu'esi nun yera'l camín. Daquella pidí sentíu común y remembré que la única vía posible pa la oficialidá de la llingua yera l'Estatutu d'Autonomía, y que la declaración de la oficialidá nos conceyos yera una forma más del '¡Viva Cartagena!' ensin nenguna viabilidá xurídica. Espero que nengún ciudadanu se vea prexudicáu. Otra manera, lo único que se pue esperar ye que cambie la sensibilidá de los ciudadanos asturianos y que voten a partíos que defenden la oficialidá de la llingua asturiana».
Más allá de too esto, Xulio Casado, de la Xunta pola Defensa de la Llingua, recuerda "que les declaraciones d'oficialidá nos conceyos hai que les enmarcar nel so contestu históricu. Prevíase una reforma estatutaria y yera la manera de demostrar el grau de madurez al que llegara'l movimientu de recuperación llingüística. Foi una midida de presión, en dalgún aspectu efectiva". Xulio Casado reconoz que yera una "oficialidá simbólica", pero que "valió cuando menos pa impusar polítiques llingüístiques nel ámbitu local, lo que ye mui de valorar". Otramanera, asegura, "lo que de verdá rescampla ye la violencia de los sucesivos Delegaos del Gobiernu, que se tomaron mui en seriu estes declaraciones simbóliques d'oficialidá, llevándoles a los tribunales, cuando yera evidente que l'algame d'elles yera bien escasu". Por too ello, la Xunta pola Defensa de la Llingua Asturiana demanda que na prósima reforma estatutaria'l parlamentu asturianu "que sí tien competencia pa facelo" dote a la llingua asturiana d'un marcu legal que garantice la igualdá de los ciudadanos.
> Noticia esbillada de Les Noticies.
Xulián Montes (ex alcalde de Nava) recuerda qu'aquella declaración d'oficialidá del asturianu en Nava, como la que s'aprobó n'otros conceyos, «yera la política de xestos del momentu, cola que se pretendía enveredar la oficialidá del asturianu dientro del Estatutu d'Autonomía. Sabíemos que la Delegada del Gobiernu, Mercedes Fernández, diba impugnar esta decisión del plenu de Nava, pero inda asina fixímoslo conscientemente: yera importante aquella política de xestos pa que se viera que la demanda social del asturianu trescendiera a les instituciones». Anque nun-y sorpriende la decisión del Tribunal Supremu, a Xulián Montes esta situación déxa-y un taste amargu: «Nestes tamos cola llingua asturiana, como hai trenta años. Nun veo movimientu. Dalgunos partíos tán como la Parrala, nin a favor nin en contra, y otros totalmente en contra». Alvierte, amás, que con estes decisiones «vese que dalquién ta mui interesáu n'arroxar el fueu de la discordia. Yo creo que tán confundíos y que toos nos teníemos que manifestar en contra d'estes coses. Una cosa tengo clara: nesto de la oficialidá, un conceyu va detrás d'otru», argumenta.
José Manuel Pérez Fernández, profesor de Derechu Alministrativu de la Universidá d'Uviéu y miembru de la Fundación Caveda y Nava, tampoco nun se sorpriende pol determín del Tribunal Supremu «que vien a da-y la razón al Trubunal Superior de Xusticia d'Asturies». Según el xurista «ye un simple problema competencial. El Tribunal Supremu diz que los conceyos nun tienen competencies pa declarar la llingua asturiana oficial y énte esto, efectivamente, poco hai que dicir». Poco, asegura, pero sí dalgo: «Podía discutise la decisión. Ente otres coses podía argumentase que l'Estatutu vixente fai una reconocencia oficial de la llingua asturiana y qu'esiste una Llei d'Usu y Promoción de la Llingua Asturiana, polo que la declaración d'oficialidá de Nava y a la d'otros conceyos se circunscribiría a estos márxenes».
Otra manera, Pablo Fernández, responsable d'organización del Bloque por Asturies, decátase de que'l «marcu idóneu» pa llograr la oficialidá de la llingua asturiana «ye l'Estatutu y que'l Bloque por Asturies trabaya dende esa perspectiva». Según el políticu nacionalista, «de lo que se trata agora ye de xuntar toles sensibilidaes en favor de la oficialidá y planteales a la hora de la reforma estatutaria, que se va producir na prósima lexislatura con una nueva correlación de fuercies parlamentaries». Más allá de too esto, Fernández diz nun «creer na politización de la xusticia nin na xudicialización de la política, polo que nun-y parez de recibu una sentencia que pon en cuestión la decisión d'un plenu, la másima representación d'un conceyu». Considera, otramanera, «qu'esti determín vien a enguedeyar más el problema» y que «van mui confundíos los que quieren engafentar una cuestión que nun ye otro qu'una lícita aspiración democrática».
José Suárez Arias-Cachero, edil popular nel Conceyu d'Uviéu, quier manifestar énte too'l so respetu poles decisiones xudiciales. Una y bones dicho esto, esclaria: «Esti determín del Tribunal Supremu vien a rescamplar les graves deficiencies del marcu legal de la llingua asturiana, un marcu insuficiente. Ye obvio qu'un Conceyu nun ye'l llugar pa regular l'usu oficial de la llingua asturiana, eso tien que facelo l'Estatutu; pero esti determín rescampla namás una cosa: la insuficiencia del actual Estatutu».
Quien nun se sorpriende n'absoluto ye Xuan Xosé Sánchez Vicente, presidente del PAS, pa quien esti determín del Tribunal Supremu «yera absolutamente previble». Sánchez Vicente remembra «que yá lu manifestara nel so día, pa escándalu de les fuerces autollamaes progresistes, qu'esi nun yera'l camín. Daquella pidí sentíu común y remembré que la única vía posible pa la oficialidá de la llingua yera l'Estatutu d'Autonomía, y que la declaración de la oficialidá nos conceyos yera una forma más del '¡Viva Cartagena!' ensin nenguna viabilidá xurídica. Espero que nengún ciudadanu se vea prexudicáu. Otra manera, lo único que se pue esperar ye que cambie la sensibilidá de los ciudadanos asturianos y que voten a partíos que defenden la oficialidá de la llingua asturiana».
Más allá de too esto, Xulio Casado, de la Xunta pola Defensa de la Llingua, recuerda "que les declaraciones d'oficialidá nos conceyos hai que les enmarcar nel so contestu históricu. Prevíase una reforma estatutaria y yera la manera de demostrar el grau de madurez al que llegara'l movimientu de recuperación llingüística. Foi una midida de presión, en dalgún aspectu efectiva". Xulio Casado reconoz que yera una "oficialidá simbólica", pero que "valió cuando menos pa impusar polítiques llingüístiques nel ámbitu local, lo que ye mui de valorar". Otramanera, asegura, "lo que de verdá rescampla ye la violencia de los sucesivos Delegaos del Gobiernu, que se tomaron mui en seriu estes declaraciones simbóliques d'oficialidá, llevándoles a los tribunales, cuando yera evidente que l'algame d'elles yera bien escasu". Por too ello, la Xunta pola Defensa de la Llingua Asturiana demanda que na prósima reforma estatutaria'l parlamentu asturianu "que sí tien competencia pa facelo" dote a la llingua asturiana d'un marcu legal que garantice la igualdá de los ciudadanos.
> Noticia esbillada de Les Noticies.
Labels: Derechos Llingüísticos
<< Home