Dos compañeros d'AXA participen nel I Conceyu Internacional de la Llingua Asturiana

El I Conceyu Internacional de la Llingua Asturiana va desendolcase na Facultá de Filoloxía de la Universidá d'Uviéu del 4 al 6 de payares, organizáu pola Academia de la Llingua Asturiana (ALLA) y cola participación de dellos de los más nomaos especialistes internacionales. El Conceyu (que fai la edición XVII de les Xornaes Internacionales d'Estudiu)preséntase so la lleenda "Más de Mil años d'Historia d'una llingua nel país de los Ástures" y entamará'l martes 4 de payares de 2008 a les 12 la mañana nel Campus d'El Milán.

El Conceyu abrirálu'l profesor de la Universidá d'Uviéu Francisco Javier Fernández Conde con una conferencia sobre la "Particularidá histórica del País Ástur" y pesllarálu un alderique'l xueves 6 a les 20 hores sobre "La llingüa nes tierres ástures: propuestes de collaboración llingüística y cultural" que va desendolcase nel Club de Prensa de La Nueva España d'Uviéu y nel que van participar Emilio Gancedo de Lleón, Alfredo hernández de Zamora, Antonio Bárbolo de Miranda do Douro y el profesor asturianu Xosé Antón González Riaño.

Nel Conceyu participarán el martes 4 de payares dos compañeros de nueso:

A les 19:00 hores, Xurde Blanco Puente (Lletráu del Serviciu Xurídicu del Principáu d'Asturies, secretariu d'AXA y académicu de l'ALLA), presentará una comunicación sobre "L'analís del derechu políticu nel Fueru Xulgu y la so aplicación na Asturies medieval", na qu'afita la tapecida tesis de la Illustración asturiana confirmando la independencia política d'Asturies na Edá Media.

Y a les 20:00 hores, Nicolás Bartolomé Pérez (abogáu y miembru d'AXA), presentará la so ponencia sobre "El Derechu del Reinu de Lleón nel sieglu XIII: fontes, lliteratura xurídica y llingua".

> Noticia esbillada d'Asturnews.
> Más información nel trípticu del Conceyu (PDF).