El CAO convoca una manifestación a favor de la oficialidá pal 4 d'ochobre

El Conceyu Abiertu pola Oficialidá (CAO) convoca una nueva manifestación pola oficialidá de la llingua asturiana col lema "Ensin Oficialidá nun hai Estatutu que valga", que saldrá de la Estación del Norte d’Uviéu a les seis de la tarde del prósimu sábadu cuatro d’ochobre.

El CAO llama a los asturianos y asturianes "a manifestar la so denuncia énte la voluntá de los partíos mayoritarios de condenar a muerte al nuesu patrimoniu llingüísticu".

Na rueda prensa, Ornosa refirióse tamién a les últimes declaraciones del voceru del Grupu Socialista nel parlamentu autonómicu, Fernando Lastra, sobre'l nuevu Estatutu d'Autonomía. Según el diputáu, los asturianos van tener los mesmos derechos y obligaciones que'l restu de los ciudadanos del Estáu.

"Eso ye mentira", afirmó Ornosa. "Tenemos negaos derechos y esti estatutu que s'aprueba nun ye nin garantía nin fonte d'ellos", afirmó. Criticó duramente a los dos principales partíos. Del PP, dixo que "xugó colos ciudadanos", porque "nel so día faló d'un favorecer un marcu llegal que garantice la sobrevivencia de la llingua". Del PSOE, afirmó que, amás de "refugar nel so congresu asturianu siete enmiendes a favor de la oficialidá, nin siquier se recoyó la declaración del asturianu como llingua".

El próximu llunes, a les 10.30 hores, tamién va tener llugar una concentración ante la Xunta'l Principáu, coincidiendo col conceyu de la Ponencia Estatutaria.

> Noticia esbillada d'Asturies.com