L'Alministración refuga'l Testamentu Vital n'asturianu

Dende'l mes de mayu pasáu Asturies tien un Rexistru d'Instrucciones previes o Testamentu Vital, que dexa que los pacientes mayores d'edá puedan manifestar los tratamientos que quieren recibir cuando yá nun tean en condiciones de tomar decisiones. Amás, los ciudadanos tamién van poder dexar constancia de la so voluntá de donación d'órganos o texíos, o de si quieren dexar el cuerpu a la investigación. Con esti tipu de documentu lo que se busca ye garantizar la llibertá d'elección de los ciudadanos.

El rexistru recueye'l documentu que formula'l ciudadanu y tramítalu al Rexistru Central pa qu'en cualquier territoriu puedan atender la demanda a tenor de lo que tenga dispuesto. El documentu ye simple -consta de tres páxines- y puede tener un representante legal pa qu'interprete la voluntá del otorgante. Tamién se pide la firma de tres testigos o d'un notariu; si l'otorgante nun quixera esti procedimientu, el responsable del rexistru tien potestá notarial. En siete díes, tres de la firma del director xeneral, inscíbese en Rexistru Nacional con validez pa tol Estáu. En cualquier momentu, l'otorgante puede modificar el so testamentu vital.

Sicasí, el Gobiernu del Principáu d'Asturies impide a los sos propios ciudadanos otorgar el so Testamentu Vital énte l'Alministración Pública n'asturianu al traviés d'esti procedimientu, refugando posibilidá tala al amparu otra vuelta na -per otru llau, inconstitucional- falta de reconocencia expresa de la condición d'oficialidá de la llingua nel Estatutu d'Autonomía.

> Noticia esbillada de Les Noticies.