L’Academia convoca un actu públicu en rempuesta a la redaición del Estatutu

L'Academia de la Llingua Asturiana (ALLA) convoca, pa esti xueves día 17 de xunetu, un actu públicu na Sala de Cámara del Auditoriu Príncipe Felipe d'Uviéu a les 19.00 hores en rempuesta al "gravísimu peligru que supón pal futuru de la llingua asturiana la propuesta de redaición del Artículu 4u del Estatutu d'Autonomía d'Asturies".

Con esta convocatoria la institución fai un llamáu "a tolos asturianos y asturianes sensibles col idioma". Nel actu, amás de la Presidenta de l'Academia que dará anuncia pública del posicionamientu de la Institución, intervendrán representantes d'estremaos sectores de la sociedá civil que viven n'asturianu y que tán enfotaos en siguir faciéndolo.

Llueu d'estes intervenciones, daráse la pallabra al públicu asistente. L'Academia yá ficiera públicu'l pasáu vienres el so desalcuerdu col "intentu consciente" que supunxo pa la institución la redaición pal artículu 4u alcordada ente los dos partíos mayoritarios nel parlamentu asturianu. La institución que dirixe Ana Cano alvirtiera entós que "de nenguna manera sedrá cómpliz d'un desafueru como'l que supón la redaición que se nos ufierta" y recuerda a los representantes políticos que roblen el pautu que "tienen que tener clara la so responsabilidá histórica nel procesu de desaniciamientu de la llingua asturiana que se ta produciendo".

> Noticia esbillada d'Asturies.com y Asturnews.