La Ponencia pa la reforma estatutaria robla un Proyeutu d'Estatutu ensin reconocer la oficialidá de la llingua, aneciando nel desacatu constitucional

Los grupos parlamentarios qu'integren la Ponencia de la Xunta Xeneral pa la Reforma Estatutaria (PSOE, PP ya IX-BA-LV) pesllaron dafecho la puerta a la reconocencia de la condición de cooficialidá de les llingües d'Asturies, calificando al asturianu y al gallego-asturianu -nún payotu y obscenu exerciciu de cinismu qu'allampia por ser una calculada humillación pa los falantes- como "patrimoniu llingüísticu qu'axunta un valor social de respetu, convivencia y entendimientu". Recueyen al empar el deber del Principáu de promover y fomentar el so usu, asina como'l so espardimientu nos medios de comunicación y la so enseñanza, respetando en tou casu les variantes. Pero too cuidándose muncho bien de nun recoyer el derechu fonderu al usu de la so propia llingua por parte los falantes, tal y como manda la Constitución y perafiten los Trataos Intenracionales ratificaos por España.

Asina, el testu iguáu pola Ponencia sedría'l que vien darréu:

L'asturianu y'l gallego-asturiano constituyen una de les manifestaciones más destacaes del patrimoniu llingüísticu d'Asturies y un valir social de respetu, convivencia y entendimientu.

El Principáu d'Asturies va velar por promover y fomentar el so usu, asina como'l so espardimientu nos medios de comunicación y la enseñanza, respetando en tou casu les variantes llocales y la voluntariedá nel so aprendizax.

Una Llei aprobada polos dos tercios de la Xunta Xeneral del Principáu va regular el so usu, enseñanza, proteición y promoción.

> Noticia esbillada d'Asturies.com, Asturnews, Atlantic Prau.