El Conseyu d'Estudiantes considera un riesgu privar a la Universidá del estudiu de la lligua asturiana

El Conseyu d'Estudiantes ve con preocupación el riesgu que supón privar a la Universidá asturiana y a los sos alumnos de la posibilidá d'abordar los estudios de llingua asturiana nel máximu referente educativu d'Asturies.

Poro, pide a la Xunta de Facultá que reconsidere la so posición y qu'adopte la decisión que más beneficie a los estudiantes, a la Universidá y al presente y futuru d'Asturies.

El Conseyu d'Estudiantes cuida que'l procesu de Bolonia ye, antes que nada, "una oportunidá, una esperanza pa converxer con otres universidaes estranxeres, pero diba ser un error facelo dando'l llombu a la llingua asturiana, qu'articula les relaciones n'Asturies dende va sieglos".

"Si queremos abrir la nuesa Universidá al futuru y la modernidá, ye imprescindible facelo esportando la nuesa cultura y, escaecese de la llingua, diba ser un gravísimu ya imperdonable erru". El Conseyu d'Estudiantes recuerda que'l marcu llegal vixente cincante la llingua asturiana atópase na Llei del Principáu que regula'l so usu y promoción: "El Principáu d'Asturies garantizará la enseñanza del bable/asturianu en tolos niveles y graos, respetando nostante la voluntariedá del so deprendizaxe". Poro, l'asturianu habrá impartise dientro l'horariu escolar y tendrá de considerase como materia integrante del currículu.

"En base a lo espuesto, nun entendemos la decisión tomada pola Xunta de Facultá de Filoloxía y cuidamos que tolos estudiantes habríen tener opción de cursar estudios d'asturianu, lo que non significa que se obligue a nadie", sorraya'l Conseyu d'Estudiantes, que insiste en que nun se pue negar esta posibilidá a los estudiantes asturianos que quieran afondar nel estudiu de la llingua.

> Noticia esbillada d'El Comercio.