Andecha Astur denuncia la imposibilidá d'incluir los topónimos asturianos nos DNI

La formación política Andecha Astur (AA) denuncia, al traviés d'un comunicáu, les torgues que presenta l'anovación del DNI d'alcuerdu cola toponimia tradicional oficializada yá nuna trentena de conceyos asturianos.

Dende'l so puntu de vista esto representa "un pasu más pa torgar el drechu de los asturianos a vivir n'asturianu, intentos españolistes qu'amuesen que nun ye posible vivir con normalidá nun país onde nun se reconocen los drechos humanos más básicos y onde nin siquiera se pue poner en tolos documentos el nome "oficial" del llugar onde vives o ú nacisti".

Asina sorrayen que "la única midía efeutiva pa salir d'estos ataques al nuesu idioma ye la oficialidá de la llingua d'Asturies comu reconocencia de los drechos llingüísticos del pueblu asturianu". Amosando pa finar el so apoyu "a toles presones afectaes".

> Noticia esbillada d'Asturies.com