SUATEA denuncia la refuga de la UNED a impartir agora los cursos d'asturianu qu'anunciara apocayá

El proyeutu d'enseñanza del asturianu nel Centru Universitariu d'Idiomes a Distancia (CUID), dependiente de la Universidá Nacional d'Educación a Distancia (UNED), anunciáu el pasáu mes de mayu pol so direutor Mario Menéndez nuna conferencia en Xixón, acaba refugase en Madrid sigún denuncia el Sindicatu Unitariu y Autónomu de los Trabayadores de la Enseñanza d'Asturies (SUATEA).

Esta situación supón una nueva discriminación pa los falantes d'asturianu, yá que nel CUID sí que se van siguir dando estudios del restu les llingues minoritaries españoles: catalán, gallegu y euskera. La iniciativa de la UNED yera perbona y la propuesta, que de mano taba aceutada, resulta qu'agora de sutrucu nun la aprueben, pola mor de "problemes teúnicos" que nun son otros que la falta de reconocencia espresa de la condición d'oficialidá del idioma nel Estatutu d'Autonomía.

D'esta miente, les Alministraciones -central y autonómica- vienen a demostrar con fechos, un día sí y otru tamién, el so acosu activu escontra la llingua y los falantes d'asturianu, por mas que se farten a falar de "voluntariedá", "fomentu" y "proteición".

> Noticia esbillada d'Atlantic Prau.
> Comunicáu de SUATEA.