La XPDLL denuncia al colexu de La Milagrosa (Uviéu) por ocultar información pública

La Xunta pola Defensa de la Llingua Asturiana (XPDLL) ta acabante denunciar un casu nuevu d'ataque a la llingua asturiana nel sistema educativu, que "vuelve evidenciar la precariedá llamentable y la situación d'alegalidá na que s'atopen los derechos llingüísticos y educativos n'Asturies".

Según delles denuncies feches por dalgunos padres a la Xunta pola Defensa de la Llingua Asturiana nel colexu "La Milagrosa" d'Uviéu, tán negándo-yos el derechu de matricular a los fíos na asignatura d'asturianu con "mentires qu'incumplen la llei" y con ocultaciones de les informaciones asoleyaes pa les matriculaciones. Como, por exemplu, "nun dexar que puean facelo nun cursu si nun lo ficieren nún anterior", lo que va contra la circular que se mandó dende la Conseyería d'Educación qu'aclaraba que sí podía facese.

Según la Xunta pola Defensa de la Llingua Asturiana, "ye pergrave que nesti colexu se tea dando la información interesada de que les clases d'asturianu nun son pa los colexos concertaos sinón pa la enseñanza pública, lo qu'incumple la llei qu'afita l'enseñu d'asturianu tanto pa los colexos públicos como pa los concertaos y qu'obliga, nos dos casos, a la ufierta pública de matriculación".

Recientemente, la Xunta pola Defensa de la Llingua denunciara tamién delles irregularidaes nes escueles Maestro Sarregui y Celestino Montoto de La Pola, nel conceyu de Siero.

> Noticia esbillada de Les Noticies.