IV Informe-Denuncia d'AXA énte'l Conseyu d'Europa

En data 10 d’ochobre de 2007, presentábemos énte'l Comité Européu pa les Llingües Rexonales o Minoritaries del Conseyu d'Europa, el nuestru III Informe-Denuncia (tituláu "L’agonía d’una llingua europea”), escontra l’Estáu español pol arrequexamientu y desamparu nos que tien asitiada a la llingua asturiana. Nelli atropábemos 81 normes, 26 d’elles reguladores del sistema educativu, empobinaes al desaniciu del asturianu y, asina, contraries dafechu a les disposiciones de la Carta Europea de les Llingües Rexonales o Minoritaries.

Pero d’entós p’acó les agresiones siguieron y n’ello ta l’orixe d’esti IV Informe-Denuncia, nel que recoyemos 14 nueves normes y 2 proyeutos que vinieron, nos caberos cinco meses, a enanchar la discriminación llegal del asturianu n’ estayes tan estremaes como’l desendolcu sostenible medioambiental; la educación infantil y profesional, el bachilleratu y la formación del profesoráu; na carrera fiscal y nel tratu nos tribunales de xusticia; na espublización de les normes; nel Nomenclátor Xeográficu Básicu d’España; énte l’Axencia Estatal d’Alministración Tributaria; nes rellaciones coles fuerces armaes y obligaciones de la Guardia Civil; na producción y distribución cinematográfica; na sociedá de la información; o nel Sistema Arbitral de Consumu.

> IV Informe-Denuncia presentáu énte'l Comité Européu pa les Llingües Rexonales o Minoritaries del Conseyu d'Europa.

> La noticia, n'Asturies.com y L'Asturies Lliberal.