Pilar Fernández Pardo (PP): Respeuto a la llingua tenemos el mesmu discursu n'Asturies qu'en Cataluña

El programa "La Lupa" na Canal 10 TV de Xixón (na estaya Programas Anteriores, pue buscase la grabación del programa), entrevistó esti martes día 4 a Pilar Fernández Pardo, candidata al Congresu pol Partíu Popular (PP) y presidenta d'esti partíu en Xixón. Tamién ye Patrona d'Honor de la Fundación Caveda y Nava.

Les sos declaraciones espeyen lo que puede ser a partir d'agora el puntu de partida del Partíu Popular en materia llingüística pa la reforma del Estatutu d'Autonomía, y son les que vienen darréu:

• Hai que puxar pola llingua asturiana y pola cultura d'Asturies, facela oficial, pero ensin obligatoriedá.
  
  
• El que quiera falar o escribir n'asturianu lo mesmo nel ámbetu oficial que nel priváu tien que lo poder facer llibremente.
  
  
• Hai que posibilitar l'ensiñu y l'emplegu de la llingua pero ensin obligar a naide.
  
  

• Si un xuez quier facer usu de la llingua nes sos sentencies o un ciudadán ante les alministraciones tienen que poder facelo, toos entendemos perfechamente l'asturiano, pa mín que nun diben facer falta traductores, pero si tien qu'habelos...
  
  
• La oficialidá tien que dir nel Estatutu y la ponencia creada na Xunta Xeneral pa la so reforma ye onde los partíos políticos tienen que falar nidiamente lo que quieren pal futuru y nesti sen la llingua ye un finxu fundamental.
  
  
• Esti ye'l mesmu discursu que tenemos en Galicia, en Valencia, onde falen gallegu y valencián, o en Mallorca o en Cataluña, nun ye contrariu al discursu del PP.

> Noticia esbillada del blogue Atlantic Prau.

> La noticia, recoyida en El Comercio y Asturnews.