Les I Xornaes de Llingua y Educación de SUATEA, los díes 4 y 5 d'abril

El Gobiernu d'Areces -pente medies del vieyu collaciu del presidente, dende los tiempos de Santiagu de Compostela, el sempiternu conseyeru Riopedre- quier dexar zarrada esti mesmu añu la organización de la educación non universitaria, aprobando los proyeutos de currículu d'infantil y bachilleratu que, colos Decretos de primaria y secundaria, constituirán un conxuntu normativu qu'incumplirá con tol descaru -en xunto y ún per ún los cuatro testos- los mandaos de la Llei del Principáu d'Asturies 1/1998 y los compromisos del Estáu español roblaos cola ratificación de la Carta Europea de les Llingües Rexonales o Minoritaries.

Dos Decretos que yá son y otros dos que van selo, illegales sí, pero afayadizos pa torgar l'accesu de la llingua asturiana, en condiciones de dignidá, a talos estudios y eso ye, al cabu, l'oxetivu del gobiernu y p'algamalu nun va reparar en "caxigalines llegales".

Ye perimportante plantar cara a esta nueva agresión y camentamos que les Xornaes de Llingua y Educación qu'entamará'l sindicatu SUATEA los díes 4 y 5 d'abril puen ser un bon llugar pa plantegar estratexes al efeutu. Ello y que l'Aconceyamientu de Xuristes pol Asturianu va tar representáu nel congresu por Xosé Lluis del Río, qu'intervendrá'l día 5 a les 9,30 hores, son razones abondes pa convidar a participar nes xornaes (el programa pue consultase equí).

Xurde Blanco. Secretariu del Aconceyamientu de Xuristes pol Asturianu.