La UNESCO celebra'l Día Mundial de la Llingua Materna

El Día Mundial de la Llingua Materna, que la UNESCO vien celebrando'l 21 de febreru dende l'añu 2000, marcará tamién güei la inaguración del Añu Mundial de les Llingües proclamáu pola ONU pa esti añu 2008. El direutor xeneral de la UNESCO, Koichiro Matsuura, declaró que "les llingües nun son un tarrén reserváu pa los espertos sinón que formen la cadarma de la vida social, económica y cultural". Precisamente esti ye'l significáu del lema qu'escoyera la UNESCO pa esti Añu Internacional de les Llingües: "Les llingües cuenten".

Calcúlase que más de la metá de les 6.700 llingües qu'hai en tol mundu tán en peligru de desapaición. Anguaño'l ritmu d'estinción ye rápidu, cada quince díes una d'elles dexa de falase, según informó la propia UNESCO. Amás, los espertos calculen que'l 96% de les llingües qu'hai nel planeta les fala un 4% de la población mundial.

Esti añu, el Día Internacional va centrase sobre manera nes ferramientes normatives internacionales rellacionaes col plurilligüismu. Asina, va tener llugar na sede de la UNESCO un seminariu sobre esti tema, que foi convocáu conxuntamente por esti organismu y el Conseyu d'Europa. Los participantes van falar, por exemplu, de la Carta Europea de les Llingües Rexonales y la Convención pa la Salvaguarda del Patrimoniu Cultural Inmaterial, de 2003.

> Noticia esbillada d'Asturies.com.