El Garrapiellu da a conocer na UNESCO l'estáu del asturianu

Sofía, la capital de Bulgaria, ye la sé del II Conceyu Extraordinariu del Comité Intergubernamental pa la Salvaguardia del Patrimoniu Cultural Inmaterial (UNESCO), que se va celebrar ente'l 18 y el 22 de febreru. El Comité Intergubernamental qu'organiza esti conceyu tien por oxetivu asesorar sobre práctiques exemplares y formular recomendaciones sobre midíes de salvaguardia del patrimoniu inmaterial a los Estaos y, nesti alcuentru, abren la participación gubernamental a diferentes colectivos sociales y culturales que trabayen nel campu del patrimoniu inmaterial.

Nesta xunta va tar Asturies representada a traviés de l'asociación cultural El Garrapiellu, que va treslladar a esti foru internacional «la situación na que s'alcuentra la llingua asturiana de perda de falantes; la necesidá de midíes de protección efectives y la inseguridá xurídica a la que la condena l'actual Estatutu», explica Sixto Armán, miembru del Garrapiellu que va asistir, xunto col creador Ánxel Nava, a la convención de Sofía. El Garrapiellu foi ún más de los colectivos asturianos convidaos a esta xunta, y va participar nella nel marcu d'actuación que l'asociación desarrolla nel Conceyu Abiertu pola Oficialidá (CAO).

La trescendencia d'esti eventu refuérzase cola celebración del Añu Internacional de la UNESCO, que lleva por lema «los idiomes sí que cuenten». Nesti sen, Armán destaca que les llingües son «una parte fundamental del patrimoniu inmaterial».

> Noticia esbillada de Les Noticies.