La XPDLL denuncia tamién l'arrequexamientu la llingua nel Currículu d'Educación Infantil

El borrador del Currículu d'Educación Infantil que presentó'l martes la Conseyería d'Eduación, nel que nun apaez por nenguna parte la enseñanza del asturianu, tuvo tamién rempuesta por parte la Xunta pola Defensa de la Llingua Asturiana (XPDLL). Mesmo que ficiera apocayá'l sindicatu SUATEA, la Xunta denunció que l'asturianu namái tien nel Currículu una presencia testimonial, por detras d'otres llingües, lo que nun respeta la llei d'usu nin l'alcuerdu de Plantiyes d'Educación Infantil y Primaria, que dexa afitao que cada centru tien que tener un especialista de llingua asturiana.

Pa los responsables de Xunta pola Defensa de Llingua, el borrador de Currículu del gobiernu ignora una realidá como ye la presencia que tien l'asturianu como idioma vivu ente la población infantil de les escueles. "En llugar d'encarar una cuestión tan fundamental, el documentu escapa d'ella como si fuera un tabú". La Xunta llamentó, por últimu, qu'estes polítiques tean llogrando que la llingua tenga cada día menos presencia na sociedá asturiana, a base d'arrequexar la so enseñanza nes primeres estayes del sistema educativu.

> Noticia esbillada d'Asturnews y Asturies.com

> Proyeutu de Decretu de la Conseyería d'Educación, pol que se regula la ordenación y s'afiten los conteníos educativos y el currículu de la Educación Infantil nel Principáu d'Asturies (PDF).

> Propuesta de Curriculum d'Educación Infantil. Anexu d'Estayes (PDF).