La Xunta pola Defensa de la Llingua convoca una concentración en Grau

La Xunta pola Defensa de la Llingua Asturiana (XPDLL) convoca una concentración, en solidaridá col compañeru tinetense Xosé Antón Cadierno Collar, el próximu xueves 13 d'avientu del 2007, a les 10 hores de la mañana delantre de los xulgaos de Grau, na plaza Longoria. Esti militante de la Xunta pola Defensa de la Llingua ta denunciáu por iguar un lletreru a la entrada de Grau. La Xunta pola Defensa de la Llingua quier denunciar la "situación llaceriosa" que ta sofriendo la toponimia tradicional asturiana. Según la Llei d'Usu y Primoción del Asturianu, nel so artículu 151: "Los topónimos de la Comunidá Autónoma del Principáu d'Asturies han tener el nome oficial na so forma tradicional (...)". Con esta denuncia, afirma la organización cívica, nun se fai otro que demonizar al movimientu de reivindicación llingüística "no que cinca a la toponimia". La Xunta pola Defensa de la Llingua reitera'l so apoyu al "compañeru Xosé Antón" y fai un llamáu a la xente p'apoyar esta concentración.

> Esbillao de Les Noticies.