Comentariu al Autu del xulgáu de lo Contencioso-Alministrativo Nu 3 d'Uviéu plantegando custión d'incosntitucionalidá escontra la Llei d'Usu

Una cosa ye que los poderes públicos reconocan una llingua como propia (cooficialidá) y otra bien estremada’l drechu de los sos falantes a emplegala énte esos poderes públicos mesmamente; entrambos dos conceutos son tracamundiaos pol xuez nel so autu.

Al empar, l'autu ignora otres cuestiones fonderes, como’l calter de los Trataos Internacionales ratificaos por España, qu’acordies col artículu 96 de la Constitución, “son parte del ordenamientu internu” y col artículu 10, que diz qu'esos Trataos inspiren la interpretación de les normes que cinquen a los drechos fundamentales.

Acordies col conteníu del Autu, mentantu nun se declare la inconstitucionalidá de la Llei 1/1998, toles Alministraciones Públiques asitiaes na entidá territorial “Principáu d’Asturies” tan obligaes a tramitar y resolver tolos escritos n'asturianu que-yos empobine cualquier ciudadanu, funcionariu o non.

Tomando en cuenta que los Trataos Internacionales ratificaos por España (vid. Artículu 12.2 de la Carta Europea de les Llingües Rexonales o Minoritaries, pente otros) obliguen al Estáu a fomentar l’emplegu de les llingües rexonales nes Alministraciones y a que los sos falantes puedan presentar solicitudes orales o escrites neses llingües, si como afita’l xuez eso ye inconstitucional cuando la llingua nun ye oficial, al Estáu español nun-y queda más que reconocer la cooficialidá del asturianu o incumplir los trataos internacionales.

> Autu de fecha 24/09/07, del xulgáu Nu 3 de lo Contencioso-Alministrativo d'Uviéu, en procedimientu 117/07 (PDF)

> Declaración del Aconceyamientu de Xuristes pol Asturianu colos comentarios a esi Autu.

> La noticia, n'Asturies.com y n'Asturnews.