L’Alministración reconoz el derechu d’un maestru a presentar documentos n'asturianu

Tres de la estimación del recursu d'alzada presentáu pol maestru del CRA Cabu Peñes, Xosé Nel Comba Paz, la Conseyería d'Educación del Principáu d'Asturies pagó-y a la fin les dietes que-y correspondíen por itinerancies profesionales y qu'en principiu nun fueran tramitaes, pola mor de nun-y aceutar un escritu dando parte d'elles por tar redactáu n'asturianu.

Dende'l sindicatu d'enseñanza SUATEA, apúntase qu'esta almisión de documentos n'asturianu por parte l'Alministración-y da la razón "doblemente" al maestru. La organización sindical afirma que ye dable exercer el derechu de dirixise a l'Alministración en llingua asturiana y alégrase de que nesti casu'l dañu se reparare, "esperando y deseando que más nunca pasen coses d'esti tipu". Tamién SUATEA, "ente l'ausencia d'amparu llegal y énte los caprichos de l'Alministración", reclama una vuelta más la oficialidá del asturianu como "la única ferramienta que garantice que nun sían conculcaos los derechos de les asturianes y de los asturianos que llibremente faigan usu del asturianu".

> Noticia esbillada d'Asturies.com