Sindicatos y Xunta pola Defensa de la Llingua amenacen con movilizaciones si Educación nun se sienta a negociar sobre l’asignatura d’asturianu

Los sindicatos denseñanza mayoritarios n'Asturies, SUATEA, FETE-UXT y CC.OO, y tamién la Xunta pola Defensa de la Llingua Asturiana dieron anuncia del entamu d'una campaña de movilizaciones si la Conseyería d'Educación del Principáu nun atiende a la so petición de diálogu pa tratar el futuru de l'asignatura d'asturianu. Dempués de la última solicitú de diálogu, fecha'l pasau 16 de marzu, y que sigue ensin rempuesta, los sindicalistes denuncien qu'Educación "fai de menos" el papel de les organizaciones sindicales. D'otra manera, los representantes sindicales declaráronse indignaos poles declaraciones a dellos medios de prensa del Conseyeru d'Educación, José Luis Iglesias Riopedre, en que da por zarráu'l conflictu pol asturianu na enseñanza, asegurando que l'asturianu nun va tener que competir en primaria con otres materies curriculares. Estes declaraciones fain albidrar al representante de SUATEA, Llinu Álvarez, qu'Educación va permitir que cada centru escueya cuál va ser l'alternativa a la clase d'asturianu, de manera que dexa la "puerta abierta a que se meta cualquier cosa siempre que nun sea curricular, colo cual podríen entrar otres materies coles que los centros, sobremanera los que compiten por atropar alumnos nuna mesma zona, entraríen nuna dinámica de competencia".

Sobre la situación del asturianu na enseñanza Secundaria, Álvarez desplicó que nel proyeutu la Conseyería, l'asignatura pasa a ser optativa "en peores condiciones reales de les que taba". Los tres sindicatos mayoritarios, que representen al 70 por cientu del profesoráu, piden que nel curriculum se tengan en cuenta una serie de puntos mínimos que Xulio Casado, representante de la Xunta pola Defensa de la Llingua Asturiana, resumió en "invertir el procesu d'elección el asturianu pa que sían los padres los que manifiesten la voluntá de nun dar asturianu y un mayor reconocimientu y horariu pa l'asignatura". El documentu col que trabaya la Conseyería, va implicar que la necesidá de facer programes de refuerzu en delles asignatures, acabará sustituyendo la materia optativa pol programa de refuerzu, lo que "supón que l'alumnáu qu'entre nesos programes nun puea cursar l'asignatura d'asturianu". La catalogación de los puestos de trabayu de los maestros d'asturianu y la creación de la especialidá d'asturianu, son otres dos de les reivindicaciones de les organizaciones sindicales, qu'amenacen con entamar una riestra movilizaciones ente esti mes y el d'abril pa forzar la negociación.

> Noticia esbillada d'Asturies.com