Hacia la desprovincialización del conflictu llingüísticu

Hai dellos díes, los medios de comunicación espardieron el conflictu surdíu pola mor l'emplegu l'asturianu, que vien enfrentando a un doctorandu de la facultá d’Hestoria cola Universidá d’Uviéu; el conteníu la sentencia del xulgáu d'instancia y la división dientro'l propiu Tribunal Superior de Xusticia d'Asturies –con sustitución del inicial maxistráu ponente, Sr. Salto Villén- nel desendolque'l posterior recursu, constitúin fechos muncho bien llaceriosos.

Tales llamentables fechos (l’actitú la Universidá, el conteníu de la sentencia d’instancia y el sospechosu ruíu dientro'l Tribunal Superior de Xusticia d’Asturies) son ñicios favoratibles a les tesis que defienden la necesidá de “desprovincializar” estos pleitos, empóbinándolos siempres al Tribunal Constitucional y, escosaes les víes xurisdiccionales internes, al Tribunal Européu de los Drechos Humanos del Conseyu d’Europa o al Comité de los Drechos Humanos de les Naciones Xuníes.

Na Xunta Xestora d'AXA tamos pol llabor de encadarmar esta vía y dir abriendo contautos al efeutu, tanto n’Estrasburgu como en Nueva York. En too casu, lo importante ye que si s’entama un pleitu llingüísticu, se faiga dexando les puertes abiertes pal recursu d’amparu, requisitu indispensable pa más sero ser quienes pa comparecer énte los Tribunales Internacionales.

> La noticia'l conflictu ente doctorando y Universidá, equí.
> La crítica d'AXA a la STSX nesti asuntu: Una sentencia llamentable.