Xilberto Maire: «El Constitucional nun esclúi espresamente a los funcionarios del derechu a usar l’asturianu»

El collaciu d'AXA Xilberto Maire, abogáu y collaborador de LES NOTICIES, valora la sentencia del Xulgáu númberu 3 d'Uviéu emitida esti 22 de marzu, onde'l maxistráu Miguel Ángel Carbajo Domingo niega a Xurde Blanco'l derechu a espresase n'asturianu cola Alministración «pola so condición de funcionariu».

¿Dictó'l Xulgáu númberu 3 d'Uviéu sentencia acordies col autu del Tribunal Constitucional o inoróse esi autu? ¿Con qué fundamentu?

Xurídicamente nun ye una sentencia fácil d’entender, non solo pola interpretación del Autu del Tribunal Constitucional, sinón tamién por cómo garra argumentos del únicu votu particular d’esti Autu y, d’otra manera, por cómo se va separando de la forma na que se presentó la cuestión d’inconstitucionalidá. Entós entendíase qu’en bona midida la sentencia diba depender de la constitucionalidá de la Llei d’Usu y, sobre manera del so artículu 4, pero, al cabu, ye como si nin la forma de presentar la cuestión d’inconstituciónalidá nin la de resolvela valieren pa gran cosa.

Xurde Blanco anunció que diba recurrir la sentencia del Xulgáu númberu 3. ¿Qué posibilidaes considera que tien de ganar nesi recursu?

De mano, en Derechu lo que val ye’l final, polo que’l recursu había prosperar. Si se quier, pue entendese que l’Autu del Constitucional nun entra por activa na distinción ente ciudadanu y funcionariu, pero lo que ye un fechu ye que tampoco nun lo fai por pasiva. Cuando’l Constitucional priva al Principáu de toa discrecionalidá a la hora d’almitir los escritos n’asturianu de cualquier ciudadanu tampoco nun esclúi expresamente a los funcionarios.Ye de pensar que si esi distingu fora tan relevante, más d’ún de los diez maxistraos diba caer na cuenta d’escluílos espresamente. Sicasí, llegáu’l casu de falar propiamente del usu del asturianu polos funcionarios, quedaría por ver la diferenciación ente los actos d’un funcionariu nel exercicu de les sos funciones estatutaries (el so trabayu diariu), y los actos d’esi mesmu funcionariu cuando lleva alantre actos propios de la xestión diaria de los sos asuntos personales énte l’Alministración.

> Entrevista esbillada de Les Noticies.