Tolivar: «Da la impresión de que la sentencia intenta 'saltar' lo que diz el Tribunal Constitucional»

LES NOTICIES quixo conocer la primer impresión de delles persones espertes en Derechu sobre la sentencia del Xulgáu númberu 3 d'Uviéu emitida esti 22 de marzu, onde'l maxistráu Miguel Ángel Carbajo Domingo niega a Xurde Blanco'l derechu a espresase n'asturianu cola Alministración «pola so condición de funcionariu».

Esta resolución conocióse depués de que'l xulgáu uviedín preguntara al Tribunal Constitucional sobre la constitucionalidá del artículu 4 de la Llei d'Usu del Asturianu. L'altu tribunal respondió con un autu onde dicía que se «privaba de toa discrecionalidá a l'Alministración autonómica a la hora d'aceptar les comunicaciones que reciba nesa llingua».

Con esti determín, entendíase que-y reconocía a Xurde Blanco, lletráu na Alministración asturiana, el derechu a dirixise a ésta nel idioma del país. Sicasí, el maxistráu Miguel Ángel Carbajo Domingo nun lo interpretó asina.

Leopoldo Tolivar Alas, catedráticu de Derechu Alministrativu na Universidá d'Uviéu, respuende a les cuestiones propuestes por esti diariu dixital sobre'l casu.

¿Dictó'l Xulgáu númberu 3 d'Uviéu sentencia acordies col autu del Tribunal Constitucional o inoróse esi autu? ¿Con qué fundamentu?

Ye una sentencia mui chocante. La verdá ye qu'una cosa ye qu'ún pueda compartir lo que se diz nun votu particular d'un autu del Tribunal Constitucional y otra cosa ye que'l votu particular sía doctrina aplicable. Y esti votu particular xustamente ye la escepción a lo que diz la mayoría y parez, depués de ver la sentencia del xulgáu d'equí, que s'intenta saltar lo que diz el Tribunal Constitucional. Ello ye que me resulta mui chocante la sentencia.Yo fui'l primeru en dicir que'l votu particular tenía argumentos dignos de ser estudiaos, como la diferencia del ciudadanu d'a pie y el que ta nuna rellación especial de suxeción cola Alministración, como ye'l casu de los funcionarios. Yera dalgo que yo podía compartir o non, pero que sí que tenía interés. Amás, tamién entiendo que'l votu particular tenía razón tocante a que'l tema merecía un pronunciamientu de fondu de sentencia y non namás un autu, pero'l votu particular ye, repito, la escepción. Podíemos dicir que ye dalgo asina como la manifestación del derechu al pataléu xurídicamente espresada. Entós pa mantenella y no emendalla el xuez d'Uviéu acuéyese a un votu particular pa evitar l'autu del Tribunal Constitucional, lo que me resulta mui chocante, por dicilo en términos delicaos.

Xurde Blanco anunció que diba recurrir la sentencia del Xulgáu númberu 3. ¿Qué posibilidaes considera que tien de ganar nesi recursu?

Parezme que'l tema, xurídicamente, ye grave. Esa decisión del xuez resúltame, insisto, enormemente chocante. Lóxicamente la Xusticia ye impredicible, pero creo que tien argumentos más que sobraos pa que prospere esi recursu y inclusive pa más coses…

> Entrevista esbillada de Les Noticies.