Suatea diz que la oficialidá ye l’únicu instrumentu que garantiza drechos

Suatea diz que l'autu del TC ye una confirmación y afitamientu del camín andáu, anque esixe la oficialidá como “únicu instrumentu afayadizu pa garantizar los drechos llingüísticos”.

El sindicatu educativu señala que présta-yos enforma que’l Tribunal Constitucional encontara la constitucionalidá de la Llei d’Usu y promoción del Asturianu de 1998, “al suponer esta sentencia una confirmación y afitamientu del camín andáu nel reconocimientu de los derechos fundamentales de la ciudadanía asturiana que nosotros incansablemente reivindicamos”.

Sicasí, dende Suatea recuerden que la sentencia afita que podemos diriximos a l’alministración n’asturianu, pero nosotros nun podemos elixir la llingua na qu’ella tramite los nuestros espedientes y nos conteste, “que será’l castellán, pues ye la única llingua que ye oficial n’Asturies”.

El sindicatu diz qu’esto ye chocante y contradiz los principios básicos de la comunicación, cortesía y civismu, el dirixise a un interlocutor nuna llingua y qu’ésti te conteste n’otra, “y más cuando esi interlocutor, l’alministración, tien por función el serviciu a la ciudadanía”.

Dende Suatea camienten que Llei d’Usu nun garantiza’l respetu de los derechos llingüísticos de la ciudadanía n’otros ámbitos distintos a l’alministración como los ayuntamientos, la universidá, la educación o los medios de comunicación. “Ye por eso, polo que Suatea, vien demandando como únicu instrumentu afayadizu pa garantizar los nuestros derechos llingüísticos en tolos ámbitos sociales la oficialidá de la llingua asturiana y el gallego-asturiano nel so territoriu”, apunten pa finar.

> Noticia esbillada d'Asturies.com