La XDLA y AXA entamen una campaña pa pidir a les autoridaes españoles que cumplan les recomendaciones del Conseyu d'Europa

La Xunta pola Defensa de la Llingua Asturiana (XDLLA) y l'Aconceyamientu de Xuristes pol Asturianu (AXA) presentaron una campaña pa reclamar que se cumpla la Recomendación del Comité de Ministros del Conseyu d'Europa sobre l'aplicación nel Estáu de la Carta Europea de les Llingües Rexonales o Minoritaries del 10 d'avientu del 2008. Nella pídese a les autoridaes españoles qu'«examinen, en collaboración colos falantes asturianos, la posibilidá d'ameyorar el nivel de protección qu'anguaño ufierta l'Estatutu d'Autonomía a la llingua asturiana».

Esta solicitú va dirixise al Conseyu de Ministros español porque, tal como indicó l'abogáu Xurde Blanco, miembru d'AXA, «l'Estáu ye'l responsable énte'l Conseyu d'Europa de cumplir coles sos resoluciones».

Concretamente, na campaña reclámase a «toles instituciones y autoridaes estatales y autonómiques responsables del cumplimientu de la Recomendación del Comité de Ministros d'Asuntos Esteriores del Conseyu d'Europa qu'entainen coles acciones necesaries p'ameyorar el nivel de protección qu'anguaño ufierta l'Estatutu d'Autonomía a la llingua asturiana, abriendo al empar los calces afayadizos p'afitar la collaboración na xera de la ciudadanía falante d'asturianu, tal como esixe'l Conseyu d'Europa».

Otra de les solicitúes que se faen a estes instituciones y autoridaes ye «la reconocencia de la nuestra condición de parte interesada nel exame de les posibilidaes d'ameyoramientu del nivel de protección de la llingua asturiana nel Estatutu d'Autonomía».

De mano, yá se sumaron a la campaña unes 25 asociaciones sociales y cíviques de toa triba, tal como informó'l representante de la XDLA, Carlos Pulgar: «Esperamos que'l númberu d'adhesiones vaiga medrando hasta tener un volume curiosu col que presentar les demandes énte les autoridaes», amestó. La campaña ta abierta nun principiu a asociaciones y organizaciones y tamién va haber la posibilidá de sumase a la iniciativa a títulu particular.

La participación pue facese a traviés de la páxina web de la XDLA. Amás, el colectivu cuenta publicar banners informativos de la campaña en medios dixitales, pa enllazar cola campaña al traviés d'ellos.

Tal como se recordó en rueda de prensa, el Conseyu d'Europa aprobó en 1992 la Carta Europea de les Llingües Rexonales o Minoritaries pa protexer el derechu a la non discriminación por cuenta de la llingua. L'Estáu español ratificó esti conveniu nel añu 2001 y d'esta manera forma parte del ordenamientu xurídicu español.

Pa facer siguimientu d'esti conveniu creóse un Comité d'Espertos del Conseyu d'Europa, que nel so últimu informe, nel 2008, punxo de manifiestu l'incumplimientu de la Carta pol Estáu español no tocante a la llingua asturiana. Nél, apuntó Xurde Blanco, señálase qu'hai una «resquiebra ente la demanda social d'un reconocimientu amañosu del espaciu qu'ocupa l'asturianu n'Asturies y el fechu de qu'esta llingua entá nun tenga'l reconocimientu de cooficial». Estes considerances fixeron concluír a la XDLA y a AXA que ye necesario articular una interlocución de la «comunidá de falantes», como se recueye na Carta, col Estáu español y col propiu Conseyu d'Europa. Nesta llinia va la campaña impulsada polos dos colectivos pa pidir l'apoyu a otres organizaciones a esta iniciativa que «nun pretende otro que facilitar los calces de comunicación colos organismos europeos y col propiu Gobiernu estatal».

> Documentu d'adhesión a la campaña. (PDF)

> Noticia esbillada de Les Noticies. Tamién n'Asturnews.